ຄອສພ  ຈັດກອງປະຊຸມແນະນຳການກຳນົດຕຳແໜ່ງງານ

ຄະນະໂຄສະນາອົບຮົມສູນກາງພັກ(ຄອສພ) ໄດ້ຈັດກອງປະຊຸມແນະນຳການກຳນົດຕຳແໜ່ງງານ  ຂຶ້ນໃນວັນທີ 17 ມັງກອນ ນີ້ ທີີີີ່ສະໂມສອນໃຫຍ່ ຂອງຄອສພ ໂດຍການເປັນປະທານ ຂອງທ່ານ ອານົງສັກ ອິນທະວົງ ຫົວໜ້າກົມຈັດຕັ້ງພະນັກງານ ຄອສພມີຮອງຫົວໜ້າກົມ, ຫົວໜ້າພະແນກ,ຮອງຫົວໜ້າພະແນກ ແລະ ພະນັກງານວິຊາການພາຍໃນ ຄອສພ ເຂົ້າຮ່ວມ.
    ຈຸດປະສົງເພືຶ່ອການກຳນົດຕຳແໜ່ງງານ ຊຶ່ງການກຳນົດຫຼັກການ, ລະບຽບການ, ມາດຕະການ ກ່ຽວກັບການຄຸ້ມຄອງ ແລະ ການກວດກາວຽກງານກຳນົດຕຳແໜ່ງງານ ເພື່ອເປັນບ່ອນອີງໃຫ້ແກ່ອົງການຈັດຕັ້ງພັກ,ລັດ, ແນວລາວສ້າງຊາດ, ສະຫະພັນນັກຮົມເກົ່າລາວ, ອົງການຈັດຕັ້ງມະຫາຊົນ ຂັ້ນສູນກາງ ແລະ ທ້ອງຖິ່ນ ໃນການກຳນົດຕຳແໜ່ງງານຢ່າງຖືກຕ້ອງ ແລະ ເປັນລະບົບ ແນໃສ່ຮັບປະກັນການປັບປຸງກົງຈັກ,ການບັນຈຸ,ການສັບຊ້ອນ, ການປະເມີນຜົນພະນັກງານ-ລັດຖະກອນ ໃຫ້ໄດ້ຮັບຜົນດີ.  ໃນກອງປະຊຸມ ທ່ານ ພອນປະເສີດ ກຸລະວົງ ຫົວໜ້າພະແນກ ພັດທະນາການຈັດຕັ້ງ ກະຊວງພາຍໃນ ໄດ້ບັນຍາຍຄວາມຮູ້ພື້ນຖານກ່ຽວກັບການກຳນົດຕຳແໜ່ງງານ ຊຶ່ງມີທັງໝົດ9ຂໍ້ຄື: 1).ຈຸດປະສົງຂອງການກຳນົດຕຳແໜ່ງງານ,2).ຄວາມໝາຍຂອງການກຳນົດຕຳແໜ່ງງານ, 3). ການວິເຄາະງານ(ວິເຄາະວຽກ) ແລະ ຂັ້ນຕອນການກຳນົດຕຳແໜ່ງງານ,4). ອົງປະກອບຂອງຕຳແໜ່ງງານ,5). ຄວາມສຳຄັນ ແລະ ຜົນປະໂຫຍດ ຂອງການກຳນົດຕຳແໜ່ງງານ, 6). ວິທີການກຳນົດຕຳແໜ່ງງານ, 7). ບາດກ້າວໃນການກຳນົດຕຳແໜ່ງງານ, 8). ສິ່ງທີ່ຄວນເອົາໃສ່ ແລະ 9). ຕົວຢ່າງການກຳນົດຕຳແໜ່ງງານ. ໃນກອງປະຊຸມ ຍັງໄດ້ແລກປ່ຽນບົດຮຽນ, ຈັດແບ່ງກຸ່ມຄົ້ນຄ້ວາກຳນົດຕຳແໜ່ງງານ ແລະ ແຕ່ລະກຸ່ມໄດ້ຂຶ້ນຜ່ານການກຳນົດຕຳແໜ່ງງານຂອງຕົນ.
ຂ່າວ-ພາບ: ພັດ ລໍວັນໄຊ